7- 9 dekabr 2023- cü il tarixlərində Gürcüstan İncəsənət Xadimləri Birliyi və Bülbül adına Orta İxtisas Musiqi Məktəbinin birgə təşkilatçılığı ilə “FUTURE STARS” XVI beynəlxalq klassik- musiqi konkurs festivalı  keçirildi. Klassik- musiqi konkurs festivalı  Bülbül adına Orta İxtisas Musiqi Məktəbinin 95 illik yubileyinə həsr olunmuşdur.
Musiqi mədəniyyətinin yaşadılması, beynəlxalq miqyasda tanıdılması və iki ölkənin dostluq məqsədi ilə keçirdiyi bu  festivala, fortepiano, simli, nəfəs alətləri və vokal ixtisasları üzrə  ümumilikdə 70 iştirakçı qatılmışdır. Festival günlərində iştirakçılara nəfəs və simli alətlər üzrə ustad dərsləri keçirildi.
9 dekabr-2023-cü il  Azərbaycan Dövlət Akademik Filarmoniyasının Kamera və Orqan Musiqisi  zalında, klassik-musiqi konkurs festivalı qaliblərinin mükafatlandırılması və yekun konserti   keçirildi.
Hər iki ölkənin dövlət himnləri səsləndirildikdən sonra qonaqları salamlayan, Azərbaycan və Gürcüstan tərəfdən layihənin rəhbərləri Xalq artisti Teymur Göyçayev və Nino  Kupatadze festival qaliblərini  təbrik edərək, onlara yeni-yeni naliyyətlər arzuladılar. 
Konsertdə qaliblərin ifasında Azərbaycan, rus və qərbi- avropa bəstəkarlarının əsərləri  səsləndirildi.
Konsert tamaşaçıların alqışları ilə  sona çatdı.